आई संदर्भ : चिंतन

आई असते एक नातं

घरघरणारं जातं

दुभंगलेली माणसं 

जोडणारं पातं असते आई 

■■■

आई असते तारा

प्रेरणांचा पिसारा

चळवळीचा गाभारा

परिवर्तनाचा झरा असते आई

■■■

आई म्हणजे …

दूध पिऊन झोपलेलं बाळ

ढगाळून आलेलं आभाळ

धो – धो पडणारा पाऊस असते आई

■■■

आई म्हणजे मेणबत्ती

स्वतः झिजून

दुसऱ्याला प्रकाश देणारी

मनातील दुःख मनात गिळून

सुखाच्या सुहासाचा 

श्वास सोडणारी

अगरबत्ती असते आई 

■■■

आई म्हणजे प्रतिक्षा

नववधुला माहेरची

वासराला गाईची

भुकेल्याला अन्नाची

पोरक्याला ममतेची

परिवर्तनाची दीक्षा असते आई

■■■

आई म्हणजे कथा 

तुकोबांची गाथा

दुखीतांची व्यथा 

जीवनाची रेखांकिता असते आई

■■■

आई म्हणजे स्वातंत्र्य

समतेचं यंत्र

न्यायाचं तंत्र

बंधुत्वाचा मंत्र

समाजाचं चित्र असते आई

■■■

आई म्हणजे वाद

दुभंगलेली माणसं जोडणारी जात

मनामनात समता पेरणारी

अंधाराला चिरून प्रकाश देणारी

चिमणीची वात ही असते आई

■■■

आई म्हणजे नवा शोध

प्रबोधनातील बोध

असतो नवा विचार

क्रांतिकारकांचा प्रहार

परिवर्तनाची धार 

शांतीचा समतेचा पेरत जाणारा

बुध्दाचा विचारही असते आई 

■■■

आई म्हणजे समृद्धी 

सुख शांतीची वृद्धी

शांती मानव धर्म हैं |

सांगणारा बोधी असते आई

■■■

आई म्हणजे पाऊस

शेतकऱ्याच्या मनातला 

पृथ्वीच्या गालातला

चातकाच्या चोचीतला

नव वधूच्या डोळ्यातील

काहूर असते आई 

■■■

आई म्हणजे निळं आकाश 

लख्ख पौर्णिमेचा प्रकाश

शुभ्रतेचा प्रताप

कर्दन काळाचा घात

अमावसेची रात ही असते आई

■■■

आई म्हणजे गाणं

पोटातलं ओठात

ओठातलं पोटात गुणगुणणं

जात्याची घरघर , जीवनाची सरसर

लोखंडाचं परिस

परीसाचं सोनं असते आई 

■■■

आई असते मैत्रीण जिवाभावाची

संकटसमयी धाऊन येणारी

तुटलेल्या मनाला …

धीर देणारी सहचरणी असते आई

■■■

आई म्हणजे चंचलता 

निर्मळतेनं वाहणारी सरिता

निसर्गाची हिरवळता

उधानलेल्या समुद्राची

 लहारात असते आई

■■■

आई काजवा ही असते 

अंधाराशी खेळणारा

मीच मीच फिरणारा

हवेतील गारवा असते आई

■■■

आई म्हणजे वाणी

नारळातील पाणी

आकाशातील चांदणी

अजिंठयाची लेणी असते आई

■■■

आई म्हणजे प्रवाह

धो- धो वाहणाऱ्या विचारांचा

समता , न्याय ,स्वातंत्र्य

आणि बंधुत्वाच्या महासागराचा

तळ ही असते आई 

■■■

आई असते पिंपळाचं पान

बोधिवृक्षाचं रान

ध्यानस्थाचं ध्यान असते आई

■■■